მესტიაში, 51 წლის მამაკაცს, რომელიც შვილის მიერ იარაღიდან შემთხვევით გასროლას ემსხვერპლა, ჭრილობა თავის არეში აქვს მიყენებული. ამის შესახებ „ინტერპრესნიუსს“ სოფელ იდლიანის რწმუნებულმა ბეჟან ჭკადუამ განუცხადა. რწმუნებული ამბობს, რომ მან მომხდარის დეტალები არ იცის.

„მესტიაში მამა „მაგთიკომის“ საბაზო სადგურში მუშაობდა, იქ იყო შვილთან ერთად მისული. არ ვიცი როგორ მოხვდა იქ გადაჭრილი თოფი, რომელიც ბავშვმა აიღო და შემთხვევით გაისროლა. იმ მომენტში იქ არავინ არ იმყოფებოდა. ბავშვი უკვე დაკითხულია და ახლა სახლშია“, - ამბობს ბეჟან ჭკადუა.

შსს-ს ინფორმაციით, მომხდარზე გამოძიება სისხლის სამართლის კოდექსის 116-ე მუხლით მიმდინარეობს, რაც გაუფრთხილებლობით სიცოცხლის მოსპობას გულისხმობს.