ხონის რაიონულ პოლიციასთან აქცია მიმდინარეობს. ხონში მცხოვრები ლიპარიძეები მათი ოჯახის წევრის, 10 წლის ბავშვის ადგილსამყოფელის დადგენას და მოზარდის დედის, მისი ადვოკატის და სოციალური სამსახურის წარმომადგენლის წინააღმდეგ შემაკავებელი ორდერის გამოცემას მოითხოვენ.

ოჯახის ადვოკატის, ლევან ჭელიძის ინფორმაციით, მათ რამდენიმე საათის წინ პოლიციას განცხადებით მიმართეს, ასევე წარუდგინეს ბავშვზე ძალადობის კადრები და რეაგირება მოითხოვეს, თუმცა პასუხი ამ დრომდე არ მიუღიათ.

ამ წუთებში პოლიციასთან ოჯახის წევრებთან და ადვოკატებთან ერთად ლიპარიძეების მეზობლებიც იმყოფებიან. მათი თქმით, არ დაიშლებიან, ვიდრე პოლიცია შემაკავებელ ორდერს არ გამოწერს და ბავშვს დედისგან არ განარიდებენ.

არასრულწლოვნის მამის მტკიცებით, ბავშვი დედასთან მძიმე ფსიქოლოგიურ პირობებში იმყოფება, რის შესახებაც შვილმა მამას ტელეფონით აცნობა.