არასწორი ინფორმაცია ვრცელდება, თითქოს ზაქარია ქუცნაშვილისთვის უფლებამოსილების შეწყვეტის პროცესი პარლამენტში დაწყებული არ არის, - ამის შესახებ საპროცედურო საკითხთა კომიტეტის თავმჯდომარე გიორგი კახიანმა ჟურნალისტებს განუცხადა.

კახიანის თქმით, პროცესი დაწყებულია და უახლოეს რიგგარეშე სესიაზე, როდესაც მოწვეულ იქნება პლენარული სხდომა, პარლამენტი პირველ საკითხად სწორედ აღნიშნულ საკითხზე იმსეჯელებს და უყრის კენჭს.

„უფლებამოსილების შეწყვეტის თაობაზე განცხადება ჯერ კიდევ გასულ კვირას წარედგინა საქართველოს პარლამენტს ზაქარია ქუცნაშვილის მხრიდან. ეს განცხადება პარლამენტის თავმჯდომარის კაბინეტის გავლით გადმოეცა საპროცედურო საკითხთა და წესების კომიტეტს, ისე, როგორც ამას რეგლამენტი ითვალისწინებს. რეგლამენტის მიხედვით, ასეთი განცხადების განხილვა საპროცედურო კომიტეტზე შესაძლებელია მხოლოდ 7 სამუშაო დღის გასვლის შემდგომ. ვინაიდან 7 სამუშაო დღე გადის 9 ივლისს, 9 ივლისიდან 1 კვირის განმავლობაში, ჩატარდება საპროცედურო საკითხთა და წესების კომიტეტის სხდომა და კომიტეტი მიიღებს შესაბამის დასკვნას. მაგრამ, იმისათვის, რომ პარლამენტის წევრს შეუწყდეს უფლებამოსილება, ამისათვის საჭიროა პარლამენტმა პლენარულ სხდომაზე შესაბამისი დადგენილება მიიღოს",-აცხადებს კახიანი.