პრემიერ-მინისტრი მამუკა ბახტაძე ევროპის საბჭოს პრეზიდენტს დონალდ ტუსკს შეხვდა. შეხვედრა დახურულ ფოტმატში წარიმართა. როგორც ჟურნალისტებს პრემიერ-მინისტრის მრჩეველმა ირაკლი ჩიქოვანმა განუცხადა, დონალდ ტუსკმა შეხვედრაზე ნათლად წარმოაჩინა ის დადებითი განწყობები, რომელიც ევროკავშირში საქართველოსადმი არსებობს.
„მნიშვნელოვანი შეხვედრა შედგა საქართველოს პრემიერ-მინისტრს და პრეზიდენტ ტუსკს შორის. ცხადი და ნათელია, რომ ევროკავშირსა და საქართველოს შორის ურთიერთობები არასოდეს ყოფილა ისე განვითარებული, როგორც დღეს არის. როგორც პრეზიდენტმა ტუსკმა განაცხადა, ჩვენ უნდა ვისაუბროთ ევროკავშირთან მიმართებაში საქართველოს კიდევ უფრო მეტ ინტეგრაციასა და ახალ მექანიზმებზე, რომელიც საქართველოს საშუალებას მისცემს სხვადასხვა სფეროში მოახერხოს ევროკავშირთან დაახლოება. პრეზიდენტი ტუსკი არის საქართველოს დიდი ხნის მეგობარი და მან ნათლად წარმოაჩინა ის დადებითი განწყობები, რომელიც ევროკავშირში საქართველოსადმი არსებობს. ეს არის ცალსახად დადებითი განწყობები და საქართველოს მიერ მიღწეული პროგრესი ყველასათვის ნათლად აღქმადი და ყველასათვის შესაქებია," - განაცხადა პრემიერ-მინისტრის მრჩეველმა სტრატეგიული კომუნიკაციის საკითხებში ირაკლი ჩიქოვანმა.