ქიბარ ხალვაში - მზად ვარ, მაქსიმალურად გავითვალისწინო დავით დვალისა და ჯარჯი აქიმიძის ინტერესი
მზად ვარ, მაქსიმალურად გავითვალისწინო დავით დვალისა და ჯარჯი აქიმიძის ინტერესი, - ამის შესახებ „რუსთავი2“ - ის წილის მფლობელმა ქიბარ ხალვაშმა განაცხადა, რითაც გამოეხმაურა ამავე ტელეკომპანიის საქმეზე სტრასბურგის სასამართლოს გადაწყვეტილებას. ხალვაშის თქმით, დღეს მან დვალისა და აქიმიძის სახელითაც გაიმარჯვა.
„მე, ქიბარ ხალვაშმა, დღეს საბოლოოდ გავიმარჯვე იმ ათობით ათასი ჩვენი თანამოქალაქის სახელით, ვისაც მოძალადე რეჟიმმა სხვადასხვა დროს წაართვა სიცოცხლე, ჯანმრთელობა და შრომით მოპოვებული ქონება, შეულახა ღირსება!
ამ კონტექსტში, არ შემიძლია, პირველ რიგში არ ვახსენო დავით დვალი და ჯარჯი აქიმიძე, რადგან მე დღეს მათი სახელითაც გავიმარჯვე. ყოველთვის მიმაჩნდა, რომ ტელევიზიის დაბრუნებისათვის ჩვენ ერთად უნდა გვებრძოლა და მიუხედავად იმისა, რომ ჩვენი თანამშრომლობა საკუთარი უფლებების აღდგენისთვის ბრძოლაში, საწყის ეტაპზე ვერ შედგა, დღეს, როდესაც გავიმარჯვე, კვლავ მზად ვარ, მაქსიმალურად გავითვალისწინო მათი ინტერესი.
ამ ეტაპზე რთულია დეტალებზე საუბარი, რადგან პირველ რიგში გასარკვევია, თუ რა მდგომარეობაში მყოფ კომპანიას ვიბარებთ,“ - აცხადებს ხალვაში.
