მოტივირებული გადაწყვეტილების მიღებისთანავე, რა თქმა უნდა, სასამართლოს გადაწყვეტილება ზემდგომ ინსტანციაში იქნება გასაჩივრებული, - ამის შესახებ 20-21 ივნისის საქმეზე ბრალდებული სპეცრაზმელის, გიორგი ესიაშვილის საქმის პროკურორმა გიორგი მუჯირმა განაცხადა.

"მოსამართლემ თავისი გადაწყვეტილებით გაიზიარა ბრალდების მხარის პოზიცია აღკვეთის ღონისძიების გამოყენებაზე ანუ ფაქტობრივ ფორმალურ საფუძვლებთან დაკავშირებით, თუმცა მიზანშეწონილად არ მიიჩნია ბრალდებულის მიმართ გამოყენებულიყო ყველაზე მკაცრი აღკვეთი ღონისძიება პატიმრობის სახით. ამას ბრალდების მხარე კატეგორიულად არ ეთანხმება და მიგვაჩნია, რომ არსებობს რეალური საფრთხე ბრალდებულის მხრიდან მოწმეებზე ზემოქმედების, მის მიერ ახალი დანაშაულის ჩადენისა და მიმალვის საშიშროება. შესაბამისად, მის მიმართ ყველაზე მკაცრი აღკვეთის ღონისძიება, პატიმრობა უნდა გამოყენებულიყო, რათა მისი სათანადო ქცევა უზრუნველყოფილიყო", - განაცხადა გიორგი მუჯირმა.

მისივე თქმით, ისინი პირველი ინსტანციის მიერ მიღებულ გადაწყვეტილებას აუცილებლად გაასაჩივრებენ.

"რა თქმა უნდა, მოტივირებული გადაწყვეტილების მიღებისთანავე ბრალდების მხარის მიერ გადაწყვეტილება ზემდგომ ინსტანციაში იქნება გასაჩივრებული,"- აღნიშნა საქმის პროკურორმა გიორგი მუჯირმა.