“საერთაშორისო რესპუბლიკური ინსტიტუტის” (IRI) კვლევების ცენტრის მიერ გამოქვეყნებული საზოგადოებრივი აზრის გამოკითხვის შედეგების მიხედვით, საქართველოში ვადამდელი საპარლამენტო არჩევნების ჩატარებას სრულად ეთანხმება გამოკითხულთა 28%, თუმცა საკმაოდ მაღალია იმ ადამიანთა რაოდენობაც, რომლებიც ფიქრობენ, რომ საკანონმდებლო ორგანოს ვადამდელი არჩევნები არ უნდა ჩატარდეს - ამ მოსაზრების მხარდასაჭერად ხმა გამოკითხულთა 24%-მა მისცა.
ვადამდელი არჩევნების ჩატარებას ნაწილობრივ ეთანხმება 24%, ნაწილობრივ არ ეთანხმება 12%.
კითხვაზე: უჭერენ თუ არა მხარს ქვეყანაში ვადამდელი საპარლამენტო არჩევნების ჩატარებას, პასუხი არ იცის ან პასუხის გაცემას თავს არიდებს გამოკითხულთა 12%.
კვლევა მთელი საქართველოს მასშტაბით 2019 წლის 20 მაისი - 11 ივნისის შუალედში ჩატარდა.