ანაკლიის პორტი არ არის რომელიმე კომპანიის, კონსორციუმის ან რომელიმე პირის პირადი პროექტი და საკუთრება. ეს არის სახელმწიფოს დაკვეთა, რომ საქართველოში აშენდეს ღრმაწყლოვანი პორტი, -ამის შესახებ პარლამენტის ვიცე-სპიკერმა თამარ ჩუგოშვილმა "ინტერპრესნიუსს" მამუკა ხაზარაძისა და ბადრი ჯაფარიძის მიმართ პროკურატურის მიერ წარდგენილი ბრალდების კომენტირებისას განუცხადა.
ჩუგოშვილის თქმით, ანაკლიის პორტი სახელმწიფო დაკვეთაა და არასწორია საკითხის ისე დაყენება, თითქოს ეს პროექტი კონკრეტული კომპანიის ან პირის საკუთრებაა.
"არაერთხელ გვითქვამს და შემიძლია გავიმეორო იგივე. ანაკლიის პორტი არ არის რომელიმე ან კომპანიის ან კონსორციუმის ან რომელიმე პირის პირადი პროექტი ან საკუთრება. ეს არის სახელმწიფოს სტრატეგიული პროექტი, ეს არის სახელმწიფოს დაკვეთა, რომ საქართველოში აშენდეს ღრმაწყლოვანი პორტი იმისთვის, რომ გაიზარდოს ჩვენი ქვეყნის გამტარუნარიანობა, ტრანზიტის შესაძლებლობები, რაც ჩვენი ქვეყნის ეკონომიკისთვის არის მნიშვნელოვანი. ამიტომ უბრალოდ შეუძლებელია საკითხის ისე დაყენება, თითქოს ეს ეკუთვნის ან ერთ კომპანიას, ან ერთ პირს, ეს არის სახელმწიფო პროექტი და სახელმწიფო ყველა ეტაპზე მაქსიმუმს აკეთებდა, რომ ხელი შეეწყო პროექტის განმახორციელებელი კომპანიისთვის პროექტის წარმატებით წარსამართად," - აცხადებს თამარ ჩუგოშვილი.
მისივე თქმით, ხელისუფლების ხელშეწყობა პროექტს ყოველთვის ჰქონდა და ექნება.