ამბროლაურის მუნიციპალიტეტში გზების მასშტაბური სარეაბილიტაციო სამუშაოები მიმდინარეობს. როგორც „ინტერპრესნიუსს“ ამბროლაურის მუნიციპალიტეტის მერიიდან აცნობეს, დაწყებულია ჭელიაღელე-თლუღი-ხოტევის გზის რეაბილიტაცია. პროექტის სახელშეკრულებო ღირებულება 1 410 397 ლარს შეადგენს და მისი საბოლოოდ დასრულება 2020 წელს იგეგმება.

ამბროლაურის მერიის ინფორმაციით, ასევე, მიმდინარეობს შიდასახელმწიფოებრივი მნიშვნელობის წესი-ურავის საავტომობილო გზის 14 კმ-იანი მონაკვეთის რეაბილიტაცია. პროექტის შესაბამისად, დაიგება ასფალტო-ბეტონის საფარი, რეაბილიტირდება 7 ხიდი, მოეწყობა წყალგამტარი მილები და საყრდენი კედლები. ასევე, გათავლისწინებულია ადგილობრივ გზებთან მიერთებების, მოსახლეობის ეზოებში შესასვლელებისა და ავტობუსის გაჩერებების მოწყობა. პროექტი სახელმწიფო ბიუჯეტიდან ფინანსდება და მისი ღირებულება 19 671 177 ლარია.

დასრულების ფაზაშია ჭრებალო-ნიკორწმინდის დამაკავშირებელი, 26 კმ-იანი საავტომობილო გზის ასფალტირება. სამუშაოები, რომელთა ჯამური ღირებულება 18 494 000 ლარს შეადგენს, 2018 წელს დაიწყო და 2019 წლის ბოლოს დასრულდება. პროექტის დასრულების შემდეგ კეთილმოწყობილი საავტომობილო გზით მუნიციპალიტეტის 8 სოფელი ისარგებლებს.

მიმდინარეობს სოფელ კრიხისა და სოფელ ჭყვიშის გზების რეაბილიტაციაც. პერიოდულად კი მუნიციპალიტეტის მიერ ხორციელდება გზების გაწმენდითი სამუშაოები, რაც ითვალისწინებს სოფლებთან დამაკავშირებელი განსაკუთრებით პრობლემური მონაკვეთების მოწესრიგებას, რათა გადაადგილება შესაძლებელი იყოს ყველა სახის სატრანსპორტო საშუალებისთვის.

2019 წელს, ინფრასტრუქტურული პროექტების განსახორციელებლად, ამბროლაურის მუნიციპალიტეტში 40 მილიონ ლარზე მეტი იხარჯება.