თუ ანტირეკლამა აიკრძალება, მაშინ ხელისუფლებამ პირველ რიგში საკუთარი თავი უნდა აკრძალოს, რადგან არავინ უკეთებს საკუთარ თავს იმდენ ანტირეკლამას, როგორც თვითონ "ქართული ოცნება", - ამის შესახებ „ინტერპრესნიუსს“ კონსტიტუციონალისტმა ლევან ბოძაშვილმა განუცხადა, რითაც „საარჩევნო კოდექსში“ მედიასაშუალებებთან მიმართებაში დაგეგმილ ცვლილებებს გამოეხმაურა.

„იურიდიულ ტექნიკას რაც შეეხება, როგორ და ვინ დაადგენს კონკრეტულ მასალაში ანტირეკლამა 25.15% იყო თუ 24.99%? ამის გარჩევა-სასამართლოების გაშუქებით უნდა დაიტვირთოს წინასაარჩევნო გარემო რომ ისედაც გადაღლილ ამომრჩეველს კიდევ უფრო მეტად დაეკარგოს არჩევნებზე მისვლის სურვილი?

ხომ არ აჯობებდა ყველა პარტიას სიასთან ერთად პოტენციური მინისტრების სიის გამოქვეყნებაც დაევალოს? მარტო ლიდერები რომ ტოლდებიან ყოველთვის და კაცმა არ იცის პარტიულ სიაში ვინ და როგორ ხვდება, იქნებ მივცეთ ამომრჩევლებს საშუალება წინასწარ იცოდეს, ვის და როგორ მთავრობას აძლევს ხმას?“, - განაცხადა ლევან ბოძაშვილმა.

შეგახსენებთ, რომ „საარჩევნო კოდექსში“ ინიცირებული ცვლილებებით, “საარჩევნო პროგრამა, ისევე როგორც სხვა ნებისმიერი მოწოდება/განცხადება/ქმედება, არ უნდა შეიცავდეს ომისა და ძალადობის პროპაგანდას, სიძულვილის ენასა და ქსენოფობიურ განცხადებებს” და მედიასაშუალებებს ეკისრება ვალდებულება, შეამოწმონ, შეესაბამება თუ არა სარეკლამო რგოლი კანონმდებლობის მოთხოვნებს, ხომ არ არის სიძულვილის ენა გამოყენებული, დაცულია თუ არა პროპორციულობა ანტირეკლამისა რეკლამასთან და ა.შ.

ამასთან, მედიაექსპერტები ყურადღებას ამახვილებენ, რომ ხელისუფლება სიძულვილის ენაში ხშირად არასწორად მოიაზრებს შეურაცხმყოფელ ტერმინებს, ამიტომ კარგად უნდა იყოს განმარტებული, რა იგულისხმება ამ ტერმინში, ამასთან, ეს იყოს პარტიების ეთიკის ნაწილი და არა მაუწყებლის პასუხისმგებლობის საკითხი.