„ქართული ოცნების“ ერთადერთი პლუსი დღემდე იყო ის, რომ საქმეს კი ვერ აკეთებენ, მაგრამ ხალხის აზრს ისმენენ, ეს ერთადერთი პლუსიც აღარ არსებობს, - ამის შესახებ „ევროპული საქართველოს“ ლიდერმა დავით ბაქრაძემ განაცხადა.

მისი თქმით, მმართველი გუნდი, რაც უფრო მეტად შეურაცხყოფს ახალგაზრდებს და აქცია „სირცხვილიას“ მონაწილეებს, პასუხად მით უფრო უარეს რეაქციას მიიღებენ.

„რაც უფრო მეტ შეურაცხყოფას მიაყენებენ იმ ახალგაზრდებს, რომლებიც გულწრფელად აპროტესტებენ გავრილოვის პარლამენტში შემოსვლას და შემდგომ მათი თანატოლებისთვის თვალების დათხრას დათვის ტყვიებით, რაც უფრო მეტ შეურაცხყოფას მიაყენენ ამ ახალგაზრდებს, რაც უფრო მეტი იარლიყის მიწებებას ეცდებიან მათთვის, რაც უფრო მეტ უკადრებელ ტერმინს და შეფასებას იკადრებენ ჩვენი კოლეგები, მით უარეს რეაქციას მიიღებენ, მით მეტად დაუპირისპირდებიან საზოგადოებრივ აზრს და მით უფრო სწრაფად და მძიმედ დაამთავრებენ საკუთარ პოლიტიკურ კარიერას. საზოგადოებასთან დაპირისპირება არავის გასვლია. საზოგადოებასთან დაპირისპირება არ გასვლია ამათზე ძლიერ ხელისუფლებებსაც კი. რა თქმა უნდა, „ქართული ოცნება“, რომლის ერთადერთი პლუსი დღემდე ის იყო, რომ საქმეს კი ვერ აკეთებენ, მაგრამ ხალხის აზრს ისმენენ, ეს ერთადერთი პლუსიც აღარ არსებობს. არათუ ხალხის აზრს აღარ ისმენენ, არამედ პირდაპირ მიდიან ხალხის აზრისა და საზოგადოების განწყობის წინააღმდეგ. ეს ვერ გააკეთა ვერც ერთმა ხელისუფლებამ, დაწყებული საბჭოთა კავშირიდანაც კი. ამას ვერ გააკეთებს „ქართული ოცნება“, - განაცხადა დავით ბაქრაძემ.