პარლამენტთან მიმდინარე აქციის ერთ-ერთი მონაწილის სოლომონ ბაჯელიძის განცხადებით, მას „ქართული ოცნების“ დეპუტატმა ვიქტორ ჯაფარიძემ პარლამენტიდან გამოსვლის შემდეგ შეურაცხყოფა მიაყენა. მომხდარი ინციდენტის შემდეგ ჯაფარიძემ ადგილი ავტომობილით დატოვა და მას აქციის წევრები გამოეკიდნენ.

მისივე თქმით, ჯაფარიძემ მას საყვირი დაუმტვრია, ფიზიკური და სიტყვიერი შეურაცხყოფაც მიაყენა.

„ქართული ოცნების“ დეპუტატმა ხელი მომარტყა და თან დაამტვრია ჩემი საყვირი, მომმართავდა მუქარის შემცველი სიტყვებით", - განაცხადა სოლომონ ბაჯელიძემ.

ამასთან, აქციის კიდევ ერთი წევრი აცხადებს, რომ პარლამენტის ეზოდან გამოსვლისას ხობის მაჟორიტარმა დეპუტატმა გიგა ბუკიამ სიტყვიერი შეურაცხყოფა მიაყენა. როგორც „ინტერპრესნიუსს" აქცია "სირცხვილიას" ერთ-ერთმა წევრმა ნიკა ფარულავამ განუცხადა, მათ კანონი არ დაურღვევიათ, უბრალოდ, სირცხვილის კორიდორი მოუწყვეს დეპუტატებს.

„გულწრფელად ვაპროტესტებთ გახარიას პრემიერობას. პარლამენტის ეზოდან გამოსვლილსას ხობის მაჟორიტარმა დეპუტატმა გიგა ბუკიამ მანქანის ფანჯარა ჩაწია და გვაგინა. ჩვენ მისთვის არც სიტყვიერი და არც ფიზიკური შეურაცხყოფა არ მიგვიყენებია. ტრანსპარანტებითა და ბანერებით დავხვდით დეპუტატებს აქ", - განაცხადა ფარულავამ.