„ანაკლიის ღრმაწყლოვანი პორტი არის ერთადერთი კომერციული პროექტი, რომელიც საქართველოს კონსტიტუციაში მოხვდა,“ - ამის შესახებ პრემიერ - მინისტრობის კანდიდატმა გიორგი გახარიამ უმრავლესობაში შემავალი ფრაქციების ფორმატში მთავრობის შემადგენლობისთვის ნდობის გამოცხადების საკითხის განხილვისას განაცხადა.

გახარიას თქმით, შეუძლებელია, სახელმწიფომ ამაზე უფრო მაღალი შეფასება მისცეს პროექტს და ქვეყნისთვის მის მნიშვნელობას.

პრემიერ-მინისტრობის კანდიდატმა ხაზი გაუსვა, რომ ზოგადად ლოგისტიკა და სატრანსპორტო-სატვირთო ინფრასტრუქტურის განვითარება კრიტიკულად მნიშვნელოვანი პრიორიტეტია ქვეყნის ეკონომიკური განვითარებისთვის.

„ანაკლიის ღრმაწყლოვანი პორტი არის ერთადერთი კომერციული პროექტი, რომელიც საქართველოს კონსტიტუციაში მოხვდა. შეუძლებელია, სახელმწიფომ ამაზე უფრო მაღალი შეფასება მისცეს პროექტს და მის მნიშვნელობას ქვეყნისთვის. თუმცა არ შეიძლება, რომ პროექტზე საკუთრების უფლება გაუჩნდეს ვიღაცას. ეს არის ქვეყნის და თითოეული მოქალაქის პროექტი და უნდა გვესმოდეს, რომ თითოეული ლარი, რომელსაც სახელმწიფო ამ პროექტში ხარჯავს (და უკვე ასობით მილიონი ლარი აქვს დახარჯული), არის თითოეული მოქალაქის შენატანი ამ პროექტის განხორციელებაში. ასევე, ყველას კარგად უნდა გვესმოდეს, რომ ყველა ნაბიჯით, რომელსაც სახელმწიფო დგამს, იძენს უფლებას, მოითხოვოს კერძო მესაკუთრეებისა და პარტნიორებისგან თავიანთი ვალდებულებების ასევე მკაფიოდ, შესაბამის ვადებში და ხარისხიანად შესრულება,“ - განაცხადა გიორგი გახარიამ.