მეთიუ ბრაიზა გახარიას პრემიერობაზე - ამბობენ, რომ ის კარგი მენეჯერია, მაგრამ ვინც საქართველოს პოლიტიკას ივნისის მერე აკვირდებოდა, აანალიზებს, რამდენად პროვოკაციულია ეს ნაბიჯი

ამბობენ, რომ გიორგი გახარია კარგი მენეჯერია, მაგრამ ვინც საქართველოს პოლიტიკას ივნისის მერე აკვირდებოდა, აანალიზებს, რამდენად პროვოკაციულია ეს ნაბიჯი", - ამის შესახებ აშშ-ს ყოფილმა დიპლომატმა, სახელმწიფო დეპარტამენტის ყოფილმა მაღალჩინოსანმა მეთიუ ბრაიზამ განაცხადა.

მან „ინტერპრესნიუსის" კითხვაზე, როგორ შეაფასებს ახალი მთავრობის დამტკიცებას და რამდენად შეიძლება მიიღოს სარგებელი „ქართული ოცნების" ხელისუფლებამ გიორგი გახარიას პრემიერ-მინისტრობით, უპასუხა, რომ „ეს პროვოკაციული ნაბიჯია დემონსტრანტებისთვის“.

„მას არასდროს შევხვედრივარ, მაგრამ გამიგია, რომ ის ეფექტური მენეჯერია და კარგად გაართმევს თავს მთავრობის მართვას ყოველდღიურად. თუმცა ნებისმიერი, ვინც საქართველოს პოლიტიკას ივნისის მერე, ბოლო პერიოდის განმავლობაში აკვირდებოდა, აანალიზებს, რამდენად პროვოკაციულია ეს ნაბიჯი. ადამიანები პარლამენტის წინ დგანან, შეიძლება, ძალიან ბევრნი არ არიან, თუმცა გამოხატავენ თავიანთი გამოხატვის თავისუფლებას. ყველა მათგანისთვის ეს გაუგებარია, რომ კონკრეტულად ეს ადამიანი, ყოფილი შს მინისტრი, ახლა პრემიერ-მინისტრია. მაგრამ ეს არ არის ამერიკის შეერთებული შტატებისთვის ის საკითხი, რაშიც ჩართული უნდა იყოს. ბევრი ადამიანი ფიქრობს, რომ ჩვენ გარკვეული როლი გქონდა „ვარდების რევოლუციის“ გამოწვევაში - ეს ასე არ არის, მაგრამ არც ამის წინააღმდეგ ვყოფილვართ. როდესაც ქართველმა საზოგადოებამ გადაწყვიტა, რომ ცვლილება უნდა მომხდარიყო, შემდეგ ამას სრულად დავუჭირეთ მხარი", - განაცხადა ბრაიზამ.

მანვე ისაუბრა იმაზეც, რომ რუსეთიდან გახარიას მისამართით თბილისისა და მოსკოვის პირდაპირ დიალოგზე კეთდება განცხადებები და აღნიშნა, რომ ამ შემთხვევაში გააჩნია რუსეთის ინტერესებს.

„ეს ყველაფერი დამოკიდებულია იმაზე, თუ რა მიზნები აქვს რუსეთს. ჩემი გამოცდილებით, ქართველები მზად არიან, ისაუბრონ რუსებთან, ეს რუსები იყვნენ, ვინც აგრესიული ნაბიჯები გადადგეს წარსულში, შეზღუდეს საზღვარზე წვდომა, ახლა შეზღუდეს ავიამიმოსვლა. ვფიქრობ, სიბრძნე იქნება დისკუსიის ქონა, თუმცა მას სად მივყავართ, ამას გადაწყვეტს ის, რომ უნდა თუ არა პუტინს, მოახდინოს დესტაბილიზაცია საქართველოში, თუ მართლა სურს, იპოვოს კონსტრუქციული გზა, რომლითაც ორი ქვეყანა შეძლებს თანაარსებობას. ამჟამად უფრო პესიმისტური შეხედულებისკენ ვიხრები, არ ვფიქრობ, რომ ის კარგს უსურვებს საქართველოს", - აღნიშნა „ინტერპრესნიუსთან" ბრაიზამ.

იხილეთ ვიდეო

რამაზ საყვარელიძე - ქართულ პოლიტიკაში უშინაარსობა უნდა დამთავრდეს, თორემ ერთფეროვნებაში, როცა არც პურია და არც სანახაობა, კიდევ უფრო გაიზრდება პოლიტიკური ნიჰილიზმი
ქართული პრესის მიმოხილვა 20.09.2019
„სოფლად ცხოვრება, როგორც ტურისტული პროდუქტი” - რა იგეგმება ბათუმში 20-21 სექტემბერს?
"ჩიპოლინო" – ევროპული საბავშვო აქსესუარები "ავერსის" ქსელში
დღეიდან, ლიბერთის ბარათით Apple Pay-ს საშუალებით გადახდისას ლიბერთის მომხმარებელი 5%-იან ქეშბექს მიიღებს
"ბაზისბანკის" შვილობილი კომპანია „ბი ეიჩ ელ ლიზინგი’’ მომხმარებელს ბაზარზე საუკეთესო პირობებს სთავაზობს
BDO-მ მე-4 კატეგორიის კომპანიების მომსახურებისთვის სპეციალური გუნდი გამოყო
რა მავნე ნივთიერებები აღმოაჩინა ჰამბურგის ლაბორატორიამ საქართველოდან გაგზავნილი თუთუნის შემადგენლობაში