"გამთლიანებულიყოს ჩვენი ქვეყანა სიბრძნით, განათლებით, მოთმინებით და ურთიერთსიყვარულით, მოყვასის სიყვარულით აგვეშენებინოს ჩვენი მომავალი", - ამის შესახებ საქართველოს პარლამენტის თავმჯდომარემ, არჩილ თალაკვაძემ ყოვლადწმინდა ღვთისმშობლის შობის დღესასწაულთან დაკავშირებით, სიონის ტაძარში, წირვისა და კათოლიკოს პატრიარქის ქადაგების შემდეგ განაცხადა.

თალაკვაძემ პირველ რიგში, ილია მეორეს მიულოცა დღესასწაული და ეკლესიას გაძლიერება უსურვა, ასევე, მიმართა თანამოქალაქეებს.

"დედა ეკლესიას ვუსურვებ, კიდევ უფრო გაძლიერდეს და კიდევ უფრო მეტად გააძლიეროს ჩვენი ხალხი და ქვეყანა. დღეს საქართველოს, ჩვენი ქვეყნის მოქალაქეებს, იმ ადამიანებს, ვინც ახლა ჩვენს ქვეყანაში რწმენით არიან ჩამოსულნი, სტუმრადაც, ყველას გილოცავთ დღევანდელ დღესასწაულს. გამთლიანებულიყოს ჩვენი ქვეყანა სიბრძნით, განათლებით, მოთმინებით და ურთიერთსიყვარულით, მოყვასის სიყვარულით აგვეშენებინოს ჩვენი მომავალი. მე დღეს ბედნიერი ვარ, რომ უწმინდესმა მიგვიღო და მოგვეცა დიდი ბედნიერება, შესაძლებლობა, რომ თქვენთან ერთად, ძვირფასო მოქალაქეებო, დებო და ძმებო, აღვნიშნოთ ეს ბრწყინვალე დღესასწაული. ღმერთმა დალოცოს ჩვენი ქვეყანა", - განაცხადა თალაკვაძემ.