სამეცნიერო კონგრესი სახელწოდებით „მეცნიერება მოგზაურობის დროს“ გაიმართა, რომლის ფარგლებშიც შეხვედრაზე მედიცინის აქტუალური საკითხები განიხილეს. ამის შესახებ „ინტერპრესნიუსს“ ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროდან აცნობეს.

მათი ინფორმაციით, კონფერენცია ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის პირველმა მოადგილემ გახსნა. თამარ გაბუნიამ ფორუმის ორგანიზატორებსა და წევრებს ღონისძიების საქართველოში ჩატარებისთვის მადლობა გადაუხადა. ამასთან, მინისტრის პირველმა მოადგილემ ჯანდაცვის სფეროში არსებულ გამოწვევებზე ისაუბრა და კონფერენციის მონაწილეებს სამინისტროს მიღწევები გააცნო.

კონგრესში მონაწილეობას 130 გერმანელი, ავსტრიელი და შვეიცარიელი ექიმი იღებს, რომლებსაც მინისტრის მოადგილე, ავსტრიის ელჩის რეზიდენციაში, დღეს საღამოსაც შეხვდება.

უწყების ცნობით, კონგრესი 10 წელია იმართება მსოფლიოს სხვადასხვა ქვეყანაში, რომლებიც მათი ისტორიის მედიცინასთან კავშირით ირჩევა.