მინდა, მკაფიოდ განვაცხადო, რომ შტაინმაიერი საქართველოში არანაირი ინიციატივით არ ჩამოდის, არანაირი წინადადებები არ აქვს კონფლიქტის მოგვარებასთან დაკავშირებით, - ამის შესახებ საქართველოს საგარეო საქმეთა მინისტრმა, დავით ზალკალიანმა განაცხადა. მან ისაუბრა გერმანიის ფედერაციული რესპუბლიკის პრეზიდენტის, ფრანკ-ვალტერ შტაინმაიერის დაგეგმილ ვიზიტზე საქართველოში და აღნიშნა, რომ ეს დიდი ხნის წინ დაიგეგმა.

„მისი ვიზიტი დიდი ხნით ადრე დაიგეგმა, ეს გადაწყვეტილება მიღებული იყო საქართველოს პრეზიდენტის გერმანიაში ვიზიტის დროს და მაშინ უკვე ჩვენთვის ცნობილი იყო, რომ საპასუხო ვიზიტით შტაინმაიერი საქართველოს ეწვეოდა. ჩვენ ვუმასპინძლეთ გერმანიის კანცლერს, ანგელა მერკელს ერთი წლის წინ, რომელიც ასევე მნიშვნელოვანი გამოხატულება იყო გერმანიის მხრიდან საქართველოს მხარდაჭერის. მინდა, მკაფიოდ განვაცხადო, რომ არანაირი ინიციატივით ის არ ჩამოდის, არანაირი წინადადებები მას არ აქვს კონფლიქტების მოგვარებასთან მიმართებაში. ეს მხოლოდ სპეკულაციებია, რაც შესაძლებელია გამოწვეული იყოს იმით, რომ ჩვენმა უკრაინელმა კოლეგებმა მის მიერ შეთავაზებული წინადადებები განიხილეს, რაც დაკავშირებულია აღმოსავლეთ უკრაინაში მიმდინარე პროცესებთან“, - აღნიშნა ზალკალიანმა.