გავრილოვის პარლამენტის თავმჯდომარის სავარძელში აღმოჩენა იყო პრობლემა, ამას ზაქარია ქუცნაშვილიც არ მოელოდა, - ასე უპასუხა ჟურნალისტების კითხვას საპარლამენტო უმრავლესობის ლიდერმა გია ვოლსკიმ, რომელიც ზაქარია ქუცნაშვილის დღეს გაკეთებულ განცხადებებს ეხებოდა.

ვოლსკი მიიჩნევს, რომ ქუცნაშვილის მიერ დეპუტატის მანდატის დატოვება სწორი გადაწყვეტილება იყო.

„პარლამენტის თავმჯდომარის გადადგომაც იყო იმ პასუხისმგებლობის დემონსტრირება, რომელიც გააჩნია მას. რუსეთის დელეგაციის წარმომადგენელი პარლამენტის თავმჯდომარის სავარძელში ჩამჯდარიყო, ეგეთი ფაქტი საქართველოს ისტორიაში არ მომხდარა. ეგ არის თემა. პრობლემა დელეგაციის ჩამოსვლაში კი არაა, რაც არ უნდა დაპირისპირებული იყვნენ სახელმწიფოები, საერთაშორისო ვალდებულებაა დელეგაციის მიღება. თვითონ სავარძელში ჩაჯდომის ფაქტი არის თემა“, - აღნიშნა ვოლსკიმ.