საოკუპაციო ხაზთან მდებარე სოფელ ატოცში, ცხინვალის ივანე მაჩაბლის სახელობის პროფესიული სახელმწიფო დრამატული თეატრი, სკოლის ეზოში მიხეილ ჯავახიშვილის „ჯაყოს ხიზნების“ მიხედვით დადგმულ სპექტაკლს მართავს.

„არა ოკუპაციას! არა სეპარატიზმს! არა ძალადობას! არა ადამიანის უფლებების უხეშ დარღვევას! - სპექტაკლი „ჯაყო“, განხორციელებულია დიდი კლასიკოსის, მიხეილ ჯავახიშვილის რომანის „ჯაყოს ხიზნების“ მიხედვით, რომელშიც მაღალმხატვრულადაა ასახული ყველა ზემოთ ჩამოთვლილი პრობლემა! თეატრი მადლობას უხდის ბატონ დიმიტრი სანაკოევს და მის ადმინისტრაციას, შიდა ქართლის სამხარეო ადმინისტრაციას და საპარლამენტო უმრავლესობის აპარატს პროექტის მხარდაჭერისთვის", - განაცხადა ცხინვალის ივანე მაჩაბლის სახელობის პროფესიული სახელმწიფო დრამატული თეატრის ხელმძღვანელმა.

ზაზა თედიაშვილის განცხადებით, იდეა თეატრის დასს ეკუთვნის და თეატრალური წარმოდგენები ასევე გაიმართება საოკუპაციო ხაზთან მდებარე რამდენიმე სოფელში: დვანში, ზემო ნიქოზსა და არბოში.