თევდორე მღვდლის 38 ნომერში მდებარე საცხოვრებელი კორპუსის აფეთქების შედეგად დაშავებული 77 წლის მამაკაცის ჯანმრთელობის მდგომარეობა ამ დროისთვის სტაბილურია და გაუარესებისკენ არ მიდის, - ამის შესახებ „ინტერპრესნიუსს“ დამწვრობის ცენტრის ხელმძღვანელმა, გუგა ქაშიბაძემ განუცხადა.

მისი თქმით, მამაკაცს სხეულის 35% აქვს დამწვარი და ამ დრომდე რჩება რეანიმაციულ განყოფილებაში

„პაციეტის ჯანმრთელობის მდგომარეობა ამ დროისთვის სტაბილურია, გაუარესების გარეშე, თუმცა, დიაგნოზი სერიოზულია. მას სხეულის მე-2 და მე-3 ხარისხის დამწვრობა აქვს მიღებული. ამას ემატება სასუნთქი გზების დაზიანება. ასეთი დაზიანება საკმაოდ სერიოზულია 77 წლის მამაკაცისთვის. ამ ტიპის დიაგნოზი ახალგაზრდისთვისაც კი სახიფათოა“, - განაცხადა გუგა ქაშიბაძემ.

შეგახსენებთ, თევდორე მღვდლის 38 ნომერში, ხუთსართულიანი კორპუსის მე-5 სართულზე აფეთქება 28 ოქტომბერს, ღამით მოხდა. ბინაში აფეთქება, სავარაუდოდ, გაზის დაგროვებამ გამოიწვია. აფეთქებას მსხვერპლი არ მოჰყოლია, თუმცა დაშავდა 77 წლის მამაკაცი,რომელიც საავადმყოფოში გადაიყვანეს. შინაგან საქმეთა სამინისტრომ მომხდარ აფეთქებასთან დაკავშირებით გამოძიება სსკ-ის 240-ე პრიმა მუხლის პირველი ნაწილით დაიწყო, რაც გულისხმობს მშენებლობის ან ექსპლუატაციის დროს უსაფრთხოების წესების დარღვევას.