საზღვაო ტრანსპორტის სააგენტო საბერძნეთის დროშის ქვეშ მცურავი გემიდან გატაცებულ ოთხ მეზღვაურთან დაკავშირებით განცხადებას ავრცელებს. როგორც უწყებაში აცხადებენ, თავდასხმის შედეგად გატაცებულია საქართველოს ერთი მოქალაქე. უწყების ინფორმაციით, მეზღვაურის გასათავისუფლებლად აქტიურად მიმდინარეობს მუშაობა.
"გადამოწმდა გავრცელებული ინფორმაცია, რომ მიმდინარე წლის 4 ნოემბერს ტოგოს დროით, დაახლოებით დილის სამ საათზე შეიარაღებული პირები თავს დაესხნენ საბერძნეთის რესპუბლიკის დროშის ქვეშ მცურავ ტანკერს. გემი ამჟამად გაჩერებულია ტოგოში, ლომეს პორტში. თავდასხმის დროს ეკიპაჟის 24 წევრიდან გატაცებულ იქნა 4 მეზღვაური: ერთი საბერძნეთის, ორი ფილიპინებისა და საქართველოს ერთი მოქალაქე. ინფორმაციის მიღებისთანავე დამატებითი დეტალების გარკვევის მიზნით, საერთაშორისო ტრანსპორტის ორგანიზაციის (ITF) საშუალებით დავუკავშირდით გემთფლობელ კომპანიას. აღნიშნული კომპანიის წარმომადგენელმა დაგვიდასტურა საქართველოს მოქალაქის გატაცების ფაქტი. ამასთან აღნიშნა, რომ ისინი მუშაობენ ეკიპაჟის წევრების გათავისუფლების საკითხზე. ასევე, ელოდებიან გამტაცებლების მხრიდან კომუნიკაციას, რომელიც კომპანიის წარმომადგენლის განმარტებით, არსებული გამოცდილებით, უახლოესი ორი-სამი დღის განმავლობაში შეიძლება შედგეს.
საქართველოს ეკონომიკისა და მდგრადი განვითარების სამინისტროს საზღვაო ტანსპორტის სააგენტო და საგარეო საქმეთა სამინისტრო ერთობლივად მუშაობენ ყველა შესაძლო გზით ქართველი მეზღვაურის ტყვეობიდან უსაფრთხოდ დასახსნელად. უკვე დავუკავშირდით ოჯახის წევრებს. თუმცა, ქართველი მეზღვაურის უსაფრთხოებიდან გამომდინარე, მნიშვნელოვანია არ გავრცელდეს მედიის საშუალებით მაიდენტიფიცირებელი ინფორმაცია", - აცხადებენ უწყებაში.
იხილეთ ვიდეო: გემიდან 4 პირი გაიტაცეს, მათ შორის 1 საქართველოს მოქალაქეა