პარლამენტთან პარტია "სამართლიანობისთვის" ახალგაზრდული ფრთა მდუმარე საპროტესტო აქციას მართავს.
„არა სასამართლოს ოკუპაციას" - ამ შინაარსის ბანერებით ისინი დეპუტატებს მოუწოდებენ, მხარი არ დაუჭირონ უზენაესი სასამართლოს მოსამართლეობის კანდიდატებს. ხელისუფლებისგან შესაბამისი რეაქციის არქონის შემთხვევაში კი მორიგ აქციას აანონსებენ.
როგორც აქციიის მონაწილეები ჟურნალისტებთან აცხადებენ, მათი მოთხოვნაა სამართლიანი სასამართლო და დეპუტატებმა არ უნდა აირჩიონ ის მოსამართლეები, რომლებიც წლების განმავლობაში იღებდნენ უსამართლო გადაწყვეტილებებს.
"ღიმილის მომგვერელია რომ დღეს, ილია ჭავჭავაძის დაბადების დღეს, მისსავე სახელობის დარბაზში მის იდეას ასამარებენ. გვინდა მოვუწოდოთ მმართველ გუნდს, ნუ დაემსგავსებიან იმათ, რასაც თავად ებრძოდნენ,"- განაცხადა აქციის ერთ-ერთმა მონაწილემ თემურ რობაქიძემ.
შეგახსენებთ, აღნიშნული აქცია გუშინ პარლამენტის დამოუკიდებელმა დეპუტატმა ეკა ბესელიამ დაანონსა. მისივე თქმით, ის ყველა დაინტერესებულ მხარესთან კონსულტაციას გამართავს და პროტესტის სამომავლო გეგმებზე ჩამოყალიბდებიან იმისთვის, რომ კენჭისყრის დღეს მათი პროტესტი კიდევ უფრო მძლავრი იყოს.