ახლა აქციაზე საჩხუბრად არ წახვიდეთ, - ასე მიმართა მოსამართლე ლეილა გოგიშვილმა კინოთეატრ "ამირანთან" ადმინისტრაციული წესით დაკავებულ მიხეილ გრძელიშვილსა და დავით თაბაგარს სასამართლო პროცესის დასრულების შემდეგ.
ამ მომენტისათვის აქციაზე ადმინისტრაციული სამართალდარღვევისთვის დაკავებული 10 პირის სასამართლო პროცესია გადადებული, ერთ პირს კი, სახდელის სახით 500-ლარიანი ჯარიმა დაეკისრა.
შეგახსენებთ, რომ ქართულ-შვედური ფილმის - „და ჩვენ ვიცეკვეთ" ჩვენება საქართველოს კინოთეატრებში გუშინ გაიმართა.
8 ნოემბერს, თბილისისა და ბათუმის კინოთეატრებთან გამართულ აქციებზე სულ 28 პირი დააკავეს. სისხლის სამართლის დანაშაულისთვის დაკავებულია 1 პირი, ადმინისტრაციული სამართალდარღვევისთვის კი 27 პირი. ინციდენტების დროს დაშავდა ორი სამართალდამცველი, რომლებსაც საავადმყოფოში შესაბამისი მკურნალობა ჩაუტარდათ.