თბილისის საქალაქო სასამართლოში პირადი ცხოვრების ამსახველი ფარული კადრების გავრცელების საქმეზე ბრალდებული 20 პირის საქმის არსებითი განხილვა მიმდინარეობს.

სასამართლო სხდომაზე მხარეები შესავალ სიტყვას წარმოთქვამენ. ადვოკატ ეკატერინე მაჭარაშვილის განაცხადებით, რომელიც საქმეზე ბრალდებულ ორ პირს-სპირიდონ სურამელსა და გიორგი კასრაძეს იცავს, მისი დაცვის ქვეშ მყოფები ბრალს არ აღიარებენ.

“ნამდვილად არ ვაღიარებ აღნიშნული ვიდეო ჩანაწერის შენახვას და მოპოვებას. რაც შეეხება გავრცელებას, ვფიქრობ, რომ გავრცელების ნაწილშიც არ იკვეთება ჩემი დაცვის ქვეშ მყოფების ბრალეულობა ან რამდენად შეიძლება გავრცელებას ვედავებოდეთ ადამიანს, როდესაც ვიდეოები ღია, საჯარო სივრცეში ისედაც გავრცელდა, ოთხი საათის განმავლობაში იდო და მგონი მთელმა საქართველომ ნახა. მაინცადამაინც ეს პირები რატომ არიან გავრცელებაში ბრალდებული, ჩემთვის სრულიად წარმოუდგენელია. უმჯობესი იქნება ბრალდების მხარემ დაადგინოს ის პირები, ვინც შექმნა ეს ვიდეო და გაავრცელა, ვინც თავი და თავი არის ამის გავრცელების. ამ უდანაშაულო ხალხს, რომლებმაც არ იცოდნენ ეს რა ვიდეო იყო და როგორ მოხვდა მათ მესინჯერში, არ შეიძლება ედავებოდეს ბრალდების მხარე ამ ვიდეოს არც მოპოვებას, არც შენახვას და არც გავრცელებას”,-განაცხადა ადვოკატმა სხდომის დაწყებამდე.

შეგახსენებთ, რომ სამართალდამცავებმა პირადი ცხოვრების ამსახველი ვიდეოჩანაწერის გავრცელების ფაქტზე ჩატარებული ოპერატიულ-საგამოძიებო მოქმედებების შედეგად, ვიდეოჩანაწერის შენახვის და გავრცელების ბრალდებით, 20 პირი დააკავეს. ყველა მათგანს ბრალი საქართველოს სისხლის სამართლის კოდექსის 157-ე პრიმა მუხლის პირველი და მეორე ნაწილებით აქვთ წარდგენილი.