პარლამენტთან ვადამდელი პროპორციული არჩევნების მოთხოვნით აქცია გვიან ღამით დასრულდა. მოძრაობა "სირცხვილიას" წარმომადგენლები დღეს, 19 ნოემბერს, 10:00 საათზე, თბილისის საქალაქო სასამართლოში მისვლას აპირებენ, რათა აქციის დაშლისას დაკავებულ აქტივისტებს მხარდაჭერა გამოუცხადონ.

ამასთან, როგორც აქციის ორგანიზატორმა შოთა დიღმელაშვილმა სიტყვით გამოსვლისას განაცხადა, დღეს, 19:00 საათზე, პარლამენტთან აქცია კვლავ განახლდება, მანამდე კი აქციის მონაწილეები ოპოზიციონერ ლიდერებთან ერთად სამოქმედო გეგმას დასახავენ.

"პარტიებთან კონსულტაციებს გავივლი და რამეს მოვიფიქრებთ. სიმართლე გითხრათ, ჯერ გეგმა არ გვაქვს", - აღნიშნა დიღმელაშვილმა.

ამ დროისთვის, პარლამენტის წინ ტროტუარზე 7 კარავია გაშლილი.