სისტემა ძალადობს რიგით პოლიციელებზე, - ამის შესახებ „ახალი საქართველოს“ გენერალურმა მდივანმა, პაატა მანჯგალაძემ ჟურნალისტებს სასამართლოში განუცხადა, სადაც აქციის დაშლისას დაკავებულებთან ერთად მისი პროცესიც უნდა გაიმართოს.
მანჯგალაძე აცხადებს, რომ მისი მხრიდან ხულიგნობასა და სამართალდამცავების დაუმორჩილებლობას ადგილი არ ჰქონია.
„სისტემა ძალადობს რიგით პოლიციელებზე. დაკავების ოქმები დაკავების ადგილზე და დამკავებელი პირების მიერ არ შემდგარა. ყველა დაკავებულის ოქმი სამსახურებრივ სიყალბეს წარმოადგენს. არანაირი მტკიცებულება მას არ გააჩნია.
არანაირ ხულიგნობას, გინებას ჩემი მხრიდან ადგილი არ ჰქონია. ჩვენს წინააღმდეგ ყალბი ჩვენების მიცემას სისტემა რიგით პოლიციელებს აიძულებს. პროცესზე შეჯიბრობითობის პრინციპი უგულებელყოფილი იყო, რადგან მხარეებს შესაძლებლობა არ ჰქონდათ, შესაბამისი მტკიცებულებები წარმოედგინათ", - განაცხადა მანჯგალაძემ.