ბორჯომის მუნიციპალიტეტის დაბა ბაკურიანისა და სოფელ დიდი მიტარბის მცხოვრებლები, ამხანაგობა „ბაკურიანი-დიდი მიტარბი“-ს წევრები მთავრობის ადმინისტრაციასთან, პარლამენტთან, იუსტიციის, ფინანსთა და ეკონომიკის სამინისტროებთან მშვიდობიან საპროტესტო აქციებს გამართავენ.

როგორც „ინტერპრესნიუსს“ ამხანაგობა „ბაკურიანი-დიდი მიტარბიდან“ აცნობეს, აღნიშნულ სახელმწიფო უწყებებთან 28 ნოემბერს, 12:00 საათიდან 18:00 საათამდე მივლენ.

დაბა ბაკურიანისა და სოფელ დიდი მიტარბის მცხოვრებლებს რამდენიმე კონკრეტული მოთხოვნა აქვთ, მათ შორის მიწების რეგისტრაციაში გატარებასა და საკუთრებაში დარეგისტრირების კუთხით. ერთ-ერთი მოთხოვნაა ასევე, 2012 წლის საპარლამენტო არჩევნების წინაპერიოდში გაჟღერებული დანაპირების შესრულება სამართლიანობის აღდგენის შესახებ.