თბილისის საქალაქო სასამართლოში 28 ნოემბერს პარლამენტთან გამართულ აქციაზე მოძრაობა “შეცვალეს” დაკავებული აქტივისტის, გიორგი რუხაიას სასამართლო პროცესი იმართება. სასამართლო სხდომაზე დღეს საქმის მტკიცებულებებს განიხილავენ და მოწმეებს გამოკითხავენ. რუხაია ბრალდებას არ ეთანხმება და აცხადებს, რომ აქციაზე მხოლოდ 2 წუთის მისული იყო, როდესაც თავს პოლიცია დაესხა და დააკავა.
“ბრალდებას არანაირად არ ვეთანხმები და ველოდები გამამართლებელ განაჩენს, იმიტომ რომ ვიდეო-მტკიცებულებებში, რაც დღეს მოვიტანე, წარვადგინე და მოწმეებიც მყავს, ჩანს, რომ ვიყავი ორი წუთის მისული, ზურგს უკნიდან თავს დამესხა პოლიცია და წამიყვანა, ჩამტენა მანქანაში. ეს იყო მხოლოდ. ორი წუთის მისული ვიყავი, მეგობრებს მივესალმე და პოლიციამ დამიჭირა. ყველა ვარიანტში გამამართლებელი განაჩენი უნდა იყოს მიღებული, თუ სასამართლომ პოლიტიკური დაკვეთა არ შეასრულა”,- განაცხადა რუხაიამ.
შეგახსენებთ, რომ გიორგი რუხაია 28 ნოემბერს პარლამენტის მიმდებარე ტერიტორიაზე გამართული აქციის დროს ადმინისტრაციული სამართალდარღვევის ბრალდებით დააკავეს.