ალეკო ელისაშვილი - ზედმეტი მოლოდინია, თუ გვგონია, რომ მესამე ძალა ბედაურით შემოვარდება საიდანღაც, ამოაპობს ფარავნის ან ბაზალეთის ტბას და შემობზრიალდება თბილისში

“ეს პერიოდი მახსენებს “ნაციონალური მოძრაობის” ბოლო პერიოდს, 2011-2012 წლებს. ეს ფილმი ყველას ნანახი აქვს. წასვლის წინ აკეთებენ ხოლმე ქართული ხელისუფლებები ასეთ რაღაცებს,- ამის შესახებ “სამოქალაქო მოძრაობის” ლიდერმა ალეკო ელისაშვილმა დღეს გამართულ პრესკონფერენციაზე განაცხადა.

მისი თქმით, დოკუმენტი უნდა გაიგზავნოს ვენეციის კომისიაში, თუ რამდენად შეესაბამება ე.წ “გერმანული მოდელი” საქართველოს კონსტიტუციას.

“თუ მართალია ხელისუფლება და შეუსაბამოა ეს მოდელი კონსტიტუციასთან, მაშინ რატომ ამბობს უარს, რომ ეს დოკუმენტი გაიგზავნოს ვენეციის კომისიაში? გავაგზავნოთ და მიუკერძოებელმა ადამიანებმა გვითხრან ოფიციალურად, შეესაბამება თუ არა. რადგან უარს ამბობენ, ე.ი მთლად წელგამართულები ვერ არიან.

ხომ შეიძლება ჩვენ აღმოვჩნდეთ სამარცხვინო მდგომარეობაში და უარი მივიღოთ? მაგრამ მივდივართ ამ რისკზე. რატომ არ მიდიან ისინი? ე.ი იტყუებიან წულუკიანი და კობახიძე და ეშინიათ, რომ ვენეციის კომისიამ თქვას, ეს მოდელი კონსტიტუციასთან შესაბამისიაო.

ახლა არა ირაკლი კობახიძის გაჯიქებული პოზიცია, არამედ საერთაშორისო ორგანიზაციის პასუხი გვაინტერესებს და თუ მათგან პასუხი იქნება, საინტერესოა, შეხვედრის მეორე რაუნდზე რა პოზიცია ექნება წულუკიანს ან კობახიძეს, რომლებიც თავს იკლავენ, ეს მოდელი კონსტიტუციასთან შეუსაბამოაო”, - განაცხადა ელისაშვილმა.

ელისაშვილი ასევე გამოეხმაურა რამდენიმე დღის წინ ქუთაისში მომხდარ ინციდენტს, როდესაც “ქართული ოცნების” და “ნაციონალური მოძრაობის” მხარდამჭერები ერთმანეთს დაუპირისპირდნენ.

“სააკაშვილი ხელისუფლებაში აღარ არის 2013 წლიდან. რვა წლის თავზე რომ მიდიხარ და “დემიშიზაცია” უნდა დავიწყოთო, იძახიან, ძალიან უხერხულში იგდებენ თავს. ან კალენდარი არ აქვთ? ან ჭკუის დამრიგებელი არ ჰყავთ? ეს ნიშნავს, რომ თვითონ ვერ გამოვიდნენ სააკაშვილის შიშებისგან.

გავაგზავნოთ ვენეციის კომისიაში და გავარკვიოთ ეს მოდელი შეესაბამება თუ არა კონსტიტუციას. თუ შეესაბამება დავნიშნოთ არჩევნები, რა “დემიშიზაციას” იწყებენ 2019 წელს, სირცხვილია”, - აღნიშნა ელისაშვილმა.

მისივე თქმით, დღევანდელ პილიტიკურ ვითარებაში ის მესამე ძალას ვერ ხედავს.

“ზედმეტი მოლოდინებია, თუ გვგონია, რომ მესამე ძალა ბედაურით შემოვარდება საიდანღაც და ამოაპობს ფარავნის ან ბაზალეთის ტბას, ამოხტება და შემობზრიალდება თბილისში”,- განაცხადა ელისაშვილმა.

იოსებ ბარათაშვილი - ახლა მთავარია, გამოძიებამ უტყუარად დაადგინოს იმ პირების ვინაობა, რომელთა ქმედებამაც გამოიწვია შაქარაშვილის გარდაცვალება
ქართული პრესის მიმოხილვა 10.07.2020
ალექსეი მალაშენკო - ვინც არ უნდა მოიგოს საქართველოს არჩევნებში, აფხაზეთისა და სამხრეთ ოსეთის საკითხებში არაფერი შეიცვლება, ამიტომ, კრემლისთვის პრინციპული მნიშვნელობა არ აქვს, ვინ გაიმარჯვებს
ყაზახეთ-საქართველოს თანამშრომლობის ახალი ეტაპი იწყება
სუბსიდირებული იპოთეკური სესხი - ახალი შესაძლებლობა ტერაბანკისგან
სილქნეტის მობილური აბონენტები თიბისის მობაილბანკით სარგებლობას ინტერნეტის დახარჯვის გარეშე შეძლებენ