2018 წელს წითელას ინფექციით მსოფლიოში 142,000 ადამიანი დაიღუპა, - ამის შესახებ ჯანდაცვის მსოფლიო ორგანიზაციის ახალ კვლევაშია აღნიშნული.

გარდა ამისა, ორგანიზაციის ინფორმაციით, 2019 წლის იანვრიდან დღემდე წითელას შემთხვევები სამჯერ მეტია გასული წლის ანალოგიურ პერიოდთან დაფიქსირებულ შემთხვევებთან შედარებით.

წითელას მსხვერპლთა უმეტესობა ბავშვია.

ექსპერტების შეფასებით, სოციალური მედიის საშუალებით გავრცელებულმა აცრის საწინააღმდეგო დეზინფორმაციამ ხელი შეუწყო წითელას შემთხვევების მატებას ისეთ ქვეყნებშიც, როგორიცაა აშშ და დიდი ბრიტანეთი.

აღსანიშნავია, რომ კონგოს დემოკრატიულ რესპუბლიკაში მიმდინარე კონფლიქტისა და დაბალი ხარისხის სამედიცინო სერვისების გამო, ძალიან ცოტა ბავშვის ვაქცინაცია ხდება. წელს იქ წითელას გამო 4,500 ადამიანი დაიღუპა, რაც ებოლას ვირუსით გარდაცვლილთა რაოდენობაზე მეტია.

წითელას ეპიდემიის გამო საგანგებო მდგომარეობა გამოცხადდა სამოაში. აღნიშნული გადაწყვეტილება სამოას ხელისუფლებამ მას შემდეგ მიიღო, რაც ქვეყანაში წითელას 60 ადამიანი ემსხვერპლა. სამოას ჯანმრთელობის სამინისტროს განცხადებით დაინფიცირებულთა რაოდენობა 4 000-ს აღემატება. ქვეყანაში სასწავლო პროცესი დროებით შეჩერებულია.