ეკონომიკისა და მდგრადი განვითარების მინისტრმა ნათია თურნავამ Welcome to Georgia-ს ტურიზმის ეროვნული დაჯილდოების მეხუთე საიუბილეო ცერემონიაზე ტურიზმის განვითარებაში შეტანილი წვლილისთვის კამპანიის Spend Your Summer in Georgia-ს ორგანიზატორები დააჯილდოვა. ამის შესახებ „ინტერპრესნიუსს“ ეკონომიკის სამინისტროდან აცნობეს.

მათი ინფორმაციით, სიტყვით გამოსვლისას ეკონომიკის მინისტრმა აღნიშნა, რომ კამპანიის ინიციატორებმა თავიანთი კრეატიული იდეით შეძლეს და გამოწვევის დროს მთელი საქართველო გაერთიანეს.

„დღეს მომეცა შესაძლებლობა, ტურიზმის განვითარებაში შეტანილი განსაკუთრებული წვლილისთვის დამეჯილდოვებინა ძალიან კრეატიული ახალგაზრდების ჯგუფი, რომელთაც მოიფიქრეს და საფუძველი ჩაუყარეს კამპანიაა „გაატარე ზაფხული საქართველოში“, რომელმაც მთელი საქართველო გააერთიანა ამ ერთიანი ლოზუნგის ირგვლივ“, - აღნიშნა ნათია თურნავამ.

ცერემონიაზე სიტყვით გამოსვლისას, ეკონომიკის მინისტრმა ასევე მადლობა გადაუხადა ტურიზმისა და მასპინძლობის სექტორში მოღვაწე ყველა ადამიანს. მისი განცხადებით, ეს დარგი და ამ დარგში მოღვაწე ადამიანები არიან ის ძალა, ვისაც საქართველოს სახელი მსოფლიოში გააქვს.

„თუკი ვინმე ბრძანდება ჩვენი ქვეყნის პატრიოტი, ეს არის ტურიზმისა და მასპინძლობის სფეროში დაკავებული ადამიანები. თქვენ შეძელით და გადაეცით თქვენი სიყვარული, თქვენი ემოცია ჩვენი ქვეყნის სტუმრებს, მთელ მსოფლიოს და მადლობა ამისთვის“, - აღნიშნა ნათია თურნავამ.

მისივე განცხადებით, მთავრობა, ეკონომიკის სამინისტრო, ტურიზმის ეროვნული ადმინისტრაცია ყველაფერს აკეთებს იმისთვის, რომ უპასუხოს სექტორში არსებულ გამოწვევებს, ასევე მხარში დაუდგეს სექტორს და კიდევ უფრო მეტი ტურისტი მოიზიდოს საქართველოში.

ნათია თურნავას თქმით, მომავალ წელს ტურიზმის ეროვნული ადმინისტრაციის მარკეტინგული კამპანია ძირითადად ორიენტირებული იქნება ისეთ საერთაშორისო პლატფორმებზე, როგორიცაა CNN, National Geographic, ბლუმბერგი, გუგლი და სხვა.

„გარდა ამისა, ჩვენ აქტიურ პოლიტიკას ვატარებთ ჩვენ საავიაციო სივრცეში, ბოლომდე გავხსენით ჩვენი ცა და მაქსიმალურად შემოგვყავს დაბალბიუჯეტიანი კომპანიები. დარწმუნებული ვარ, ეს საშუალებას გაძლევთ, უკეთ მოემსახუროთ თქვენს ბიზნესს, ამ დარგს, ჩვენ მოსახლეობას და რა თქმა უნდა, მეტი ტურისტი შემოიყვანოთ ქვეყანაში“, - განაცხადა ნათია თურნავამ.

„ღონისძიებას 700-მდე სტუმარი დაესწრო, მათ შორის მთავრობის წარმომადგენლები, ბიზნეს სექტორი და საერთაშორისო და ადგილობრივი მედია. ღონისძიებას ასევე ესწრებოდა ეკონომიკის სამინისტროს ტურიზმის ეროვნული ადმინისტრაციის ხელმძღვანელი მარიამ ქვრივიშვილი. დაჯილდოების ცერემონიაზე, ტურიზმისა და მასპინძლობის დარგის 380-ზე მეტ წარმომადგენელს შორის 26 გამარჯვებული გამოვლინდა. ტურიზმის ეროვნული დაჯილდოება არის ყოველწლიური ღონისძიება, რომელიც 2015 წლიდან ტარდება საქართველოში, და წარმატებით დაიმკვიდრა თავი როგორც სანდო, უნიკალურმა პლატფორმამ, რომელსაც მნიშვნელოვანი წვლილი შეაქვს ქართული ტურიზმის და მასპინძლობის სფეროს განვითარებაში,“ - ნათქვამია ინფორმაციაში.