ყველა უწყება, ვისაც რაიმე შეხება აქვს მოზარდებთან, გადახედავს თავის პოლიტიკას და არსებულ პრობლემებს, - ამის შესახებ ეკონომიკისა და მდგრადი განვითარების მინისტრმა ნათია თურნავამ ჟურნალისტებს მთავრობის სხდომის დასრულების შემდეგ განუცხადა.
როგორც თურნავამ აღნიშნა, საკითხის პოლიტიზირებისგან ყველამ თავი უნდა შეიკავოს.
"პირველ რიგში, ეს არის ძალიან დიდი ტრაგედია, არა მხოლოდ ერთი ოჯახის ტრაგედია. ძალიან მიჭირს, როგორ შეიძლება მშობელს შეუმსუბუქო შვილის ასეთი ტრაგიკული დაკარგვა. ეს არის მთელი ქვეყნის ტრაგედია და მეც, როგორც მთავრობის წევრი, როგორც დედა ძალიან დიდ მწუხარებას გამოვთქვამ ლუკას გარდაცვალების გამო. ზოგადად, ეს არის პრობლემა, ამ პრობლემაზე ყველა სახელმწიფო უწყება თავ-თავიანთი კომპეტენციის ფარგლებში ფიქრობს და ზრუნავს, ვსაუბრობ მოზარდებთან ურთიერთობის პრობლემაზე. ყველა უწყება ვისაც რაიმე შეხება აქვს მოზარდებთან, გადახედავს თავის პოლიტიკას და არსებულ პრობლემებს. როგორც ვიცით, დღეს მთავრობის ადმინისტრაციაში იმართება პირველი შეხვედრა, რომელშიც სხვადასხვა უწყება მიიღებს მონაწილეობას და ვიმსჯელებთ, როგორ შეიძლება მოზარდებთან ურთიერთობის პრაქტიკა და პოლიტიკა გავაუმჯობესოთ",- განაცხადა თურნავამ.
კითხვაზე: უნდა დადგეს თუ არა შინაგან საქმეთა მინისტრის, ვახტანგ გომელაურის პასუხისმგებლობის საკითხი? თურნავამ უპასუხა: "თავი შევიკავოთ ამ საკითხის პოლიტიზირებისგან. მიმდინარეობს დამოუკიდებელი მოკვლევა და ყველა კითხვას გაეცემა პასუხი. თქვენ პროკურორი ბრძანდებით?!"- მიმართა თურნავამ ჟურნალისტს.