მოძრაობა "შეცვალეს" წევრებმა თბილისის მერიასთან აქცია სახელწოდებით "სიკვდილით სავსე ქალაქი" გამართეს. მათი მთავარი მოთხოვნა თბილისის მერიის მიერ ორგანიზებული საახალწლო ღონისძიებების გაუქმებაა.

როგორც მოძრაობა „შეცვალეს" წევრებმა "ინტერპრესნიუსთან" საუბრისას განაცხადეს, ქვეყანაში არსებული მდგომარეობიდან გამომდინარე, მათ ნამდვილად არ ეზეიმებათ. მოძრაობის წევრებმა დედაქალაქის მერიის წინ სიმბოლურად "ამ სისტემის დედაც" დაწერეს.

"ჩვენ აქ მოსვლით კახა კალაძეს გვინდა დავანახოთ, რომ ეს არ არის სიცოცხლით სავსე ქალაქი, ეს არის სიკვდილით სავსე ქალაქი. ეს ყველაფერი იმ სისტემის თარეშმა გამოიწვია, რომელიც რეალურად არის ჩამოყალიბებული. იმ მძიმე ვითარებაში, რომელშიც ახლა ჩვენი ქვეყანა იმყოფება საზეიმოდ ნამდვილად არ გვაქვს საქმე. ჩვენ მოვითხოვთ, რომ ის საახალწლო ღონისძიებები, რომლებიც დაგეგმილია გაუქმდეს. ქვეყანაში შექმნილი პრობლემებიდან გამომდინარე, საზეიმოდ, კიდევ ერთხელ ვამბობთ, რომ ნამდვილად არ გვაქვს საქმე", -განაცხადა მოძრაობა "შეცვალეს"აქტივისტმა გიორგი კუპატაძემ.