ბაკურიანში რამდენიმე სასტუმროს წყალმომარაგების სრულად აღდგენის მიზნით, მთელი ღამის განმავლობაში დაგეგმილია გაერთიანებული წყალმომარაგების კომპანიის ტექნიკური ჯგუფის სამუშაოები, რის გამოც, 6 იანვარს 23:00 საათიდან 7 იანვრის დილის 08:00 საათამდე, დაბას წყალმომარაგება შეეზღუდება.

„ამ დღეების განმავლობაში ბაკურიანის ძირითად ნაწილს წყალი სტაბილურ რეჟიმში მიეწოდებოდა. საკურორტო ზონის 80 პროცენტი 24-საათიანი წყალმომარაგებით არის უზრუნველყოფილი.

წყლის მიწოდების პრობლემა აქვთ სასტუმროებს ,,რუმსს’’ ,,მგზავრებს’’ და ,,პანორამას’’, ასევე წაქაძისა და აღმაშენებლის ქუჩების ნაწილს.

ბაკურიანში ბოლო დღეებში შექმნილი პრობლემის აღმოსაფხვრელად კომპანიის ბრიგადები ამ დრომდე მუშაობენ. ყველა ის სასტუმრო, სადაც წყლის მიწოდება შეზღუდულია, წყალმზიდების საშუალებით მარაგდებიან. პროცესში ჩართულია სახანძრო მანქანები“, - ნათქვამია რეგიონული განვითარების სამინისტროს მიერ გავრცელებულ ინფორმაციაში.