„ევროპული საქართველოს“ ერთ-ერთი ლიდერის გიგა ბოკერიას განცხადებით, ხელისუფლებასთან უსაფრთხოების პოლიტიკასთან დაკავშირებით ბრალდებები არსებობს, თუმცა გუდაური-ქვეშეთი-კობის გზა პრობლემას არ წარმოადგენს.

როგორც გიგა ბოკერიამ პარტიის ოფისში გამართულ ბრიფინგზე აღნიშნულ გზასთან დაკავშირებით ხაზარაძის განცხადების თაობაზე დასმული კითხვის საპასუხოდ განაცხადა, პრობლემა მთლიანად უსფრთხოების პოლიტიკაშია.

„ჩვენ ივანიშვილის ხელისუფლებასთან გვაქვს უმძიმესი და უსერიოზულესი ბრალდებები, ჩვენ და მთელ საზოგადოებას უსაფრთხოების პოლიტიკასთან დაკავშირებით. ეგ გზა არ არის ამ ბრალდებებს შორის ნამდვილად. მაგ გზაში და გვირაბში პრობლემა არაა, მაგრამ არის მთლიან უსაფრთხოების პოლიტიკაში და არა მაგ გზაში“,- განაცხადა ბოკერიამ.

ცნობისთვის, ლელოს“ დამფუძნებელმა მამუკა ხაზარაძემ დღეს ანაკლიის ღრმაწყლოვანი პორტისა და ქვეშეთი-კობის საგზაო პროექტი შეადარა ერთმანეთს.

როგორც ხაზარაძემ აღნიშნა, სახელმწიფო ნახევარ მილიარდ დოლარს გამოყოფს ჩრდილოეთის გზისთვის, მაშინ, როცა გაცილებით მასშტაბური „ანაკლიის განვითარების პროექტისთვის“ 50 მილიონის გარანტიის გამოყოფაზე თქვა უარი.