ჩემი ინფორმაციით, საქართველოს ე.წ. საზღვრისპირა ტერიტორიაზე არ უშვებენ ჟურნალისტებს და აქტივისტებს და ჩემი კითხვა იქნება რატომ? მივიჩნევ, რომ ხელისუფლებამ ინფორმაცია უნდა მიაწოდოს თავის მოქალაქეებს, თუ რა ხდება, - ამის შესახებ ევროპარლამენტარმა მარია გრიგოროვამ ბრიუსელში, ევროპარლამენტის საგარეო კომიტეტის სხდომაზე სიტყვით გამოსვლისას განაცხადა.

„მინისტრმა, ქეთევან ციხელაშვილმა ახსენა ჩორჩანაში არსებული ვითარება; ასევე, ექიმი ვაჟა გაფრინდაშვილი. მინდა ორი კითხვა დავსვა, რომელიც ამას უკავშირდება. ჩორჩანაში სრულიად ახალი სიტუაციაა, მიმდინარეობს ხეების მონიშვნა, კვლავ მიმდინარეობს ბორდერიზაციაც, სრულიად განსხვავებული მასშტაბებით, თუმცა, ჩემი ინფორმაციით, იქ არ უშვებენ ჟურნალისტებს და აქტივისტებს და ჩემი კითხვა იქნება - რატომ ? რადგან მივიჩნევ, რომ ხელისუფლებამ ინფორმაცია უნდა მიაწოდოს თავის მოქალაქეებს თუ რა ხდება“,- განაცხადა მარია გრიგოროვამ.

ის ასევე დაინტერესდა ექიმ ვაჟა გაფრინდაშვილის გათავისუფლების საკითხით, უფრო კონკრეტულად კი იმით, თუ ვინ გადაიხადა ჯარიმა ექიმის გათავისუფლებისთვის, ხელისუფლებამ, არასამთავრობო სექტორმა თუ კონკრეტულმა ინდივიდმა.