თურქეთის პრეზიდენტი რეჯეფ თაიფ ერდოღანი ქვეყნის მოსახლეობას მიმართავს, მიწისძვრასთან დაკავშირებულ ჭორებსა და საწინააღმდეგო პროპაგანდას არ აჰყვნენ.

„ევრონიუსის“ ინფორმაციით, ერდოღანი მიწისძვრისგან დაზარალებულ რაიონებს ესტუმრა და დაზარალებულ მოსახლეობას მიმართა, რომ არ დაიჯერონ გავრცელებული ჭორი იმის შესახებ, რომ ქვეყანა მიწისძვრისთვის მოუმზადებელი იყო.

„ნუ უსმენთ ჭორებს და ნეგატიურ, საწინააღმდეგო პროპაგანდას, ჩვენ თქვენს სამსახურში ვართ,“- განაცხადა ერდოღანმა.

ბოლო მონაცემებით, მიწისძვრას 29 ადამიანის სიცოცხლე ემსხვერპლა, დაშავებულთა რაოდენობა კი 1,243-ს აღწევს.

შეგახსენებთ, 24 იანვარს თურქეთის აღმოსავლეთში, ელაზიღის პროვინციაში 6,8 მაგნიტუდის სიმძლავრის მიწისძვრა მოხდა. მიწისძვრის ეპიცენტრი 6,5 კილომეტრის სიღრმეზე ქალაქ სივრიჯესთან დაფიქსირდა.