„უმრავლესობის წევრებს უწევთ საზოგადოებას ჩახედონ თვალებში და დაინახონ, გადაგდებული და მოტყუებული საზოგადოება როგორ არ აპირებს შეეგუოს მათ ასეთ პოლიტიკურ თავხედობას“, - ამის შესახებ „ევროპული საქართველოს“ ერთ-ერთმა წევრმა ირაკლი აბესაძემ „პალიტრანიუსს“ პარლამენტთან მიმდინარე აქციაზე განუცხადა.
მისი თქმით, „ოპოზიციური ერთიანობის და მოლაპარაკებების პარალელურად, მუდმივად გაგრძელდება მწვავე აქციები“.
„ამ ქვეყანაში 2020 წელს უნდა ჩატარდეს სამართლიანი არჩევნები. არჩევნები, რომლის შედეგსაც განსაზღვრავს ამომრჩევლის ნება და არ ექნება უფლება და შესაძლებლობა ივანიშვილს, რომ ჩაებღაუჭოს ძალაუფლებას საზოგადოებრივი მხარდაჭრის არარსებობის პირობებში, რომლის დიდი იმედიც აქვს. ჩვენ ვხედავთ როგორ სირაქლემას პოზაშია ივანიშვილი და არ იმჩნევს არც ქართულ საზოგადოებას და არც იმ უმწვავეს კრიტიკას, რომელიც მოდის ჩვენი საერთაშორისო პარტნიორებისგან და მეგობრებისგან და რომელიც მნიშვნელოვნად აზიანებს ქვეყნის დემოკრატიულ იმიჯს და საფრთხეს უქმნის ქვეყნის დემოკრატიულ განვითარებას. ამიტომ რა თქმა უნდა, ეს აქციები იქნება უფრო და უფრო მეტად მწვავე და ივანიშვილს აუცილებლად მოუწევს დათმოს და მიიღოს სამართლიანი საარჩევნო სისტემა“, - განაცხადა აბესაძემ.