„ვფიქრობ, აშშ-ს კონგრესმენები და სენატორები ითვალისწინებენ, რომ თუ რეფორმები არ განხორციელდება, ამას გარკვეული საპასუხო რეაქცია მოჰყვება“, - ამის შესახებ ევროპარლამენტარმა მარკეტა გრეგოროვამ „ინტერპრესნიუსს“ ექსკლუზიურ ინტერვიუში განუცხადა.

მან ისაუბრა იმის შესახებ, რას უნდა ელოდოს საქართველო იმ შემთხვევაში, თუ წინასაარჩევნო პერიოდი საერთაშორისო სტანდარტების შესაბამისად არ წარიმართება და დასავლელ პარტნიორებს გარკვეული კითხვები ექნებათ.

„ვფიქრობ, აშშ-ს კონგრესმენებისა და სენატორების წერილებშიც იყო, რომ ისინი ითვალისწინებენ, რომ თუ რეფორმები არ განხორციელდება, ამას გარკვეული საპასუხო რეაქცია მოჰყვება, რადგან ისინი არჩევნებს ლეგიტიმურად არ ჩათვლიან. რაც შეეხება ევროკავშირს, რა თქმა უნდა, მხარს ვუჭერთ რეფორმებს, მაგრამ ასევე არ გვინდა, რომ სიტუაცია რიგითი მოქალაქეებისთვის უფრო გავართულოთ. მაგალითად, უვიზო მიმოსვლის რეჟიმი შეეხება საქართველოს ჩვეულებრივ მოქალაქეებს და არა - პოლიტიკოსებსა და ამაზე პასუხისმგებლობის მქონე პირებს. ჩვენ რა თქმა უნდა, არ გვსურს, სიტუაცია, ასე ვთქვათ, უფრო „ძალადობრივი“ ან დრამატული გავხადოთ, შესაბამისად, გარკვეული ზომები და პასუხი ამას მოჰყვება და რასაკვირველია, არჩევნები დაკვირვების ქვეშ იქნება, თუმცა ასეთ მწვავე პასუხს, როგორიც უვიზო მიმოსვლის შეჩერებაა, არ ველოდები“, - განაცხადა გრეგოროვამ.

მისივე თქმით, არასტაბილური საქართველო ან არასტაბილური აღმოსავლური პარტნიორობა ყოველთვის უწყობს ხელს რუსულ „ფასს“.

„ის, თუ როგორ პოზიციაშია მთავრობა ამჟამად, როგორ ქმედებებს ახორციელებს და როგორ დაიწყო ეს ყველაფერი, ვითარებას უკეთესობისკენ არ ცვლის, ხომ ასეა? დისკუსიაც იმის შესახებ, თუ „რა ხდება სინამდვილეში და ვინ არის მართალი“, ხელს უწყობს სადეზინფორმაციო კამპანიებსა და უცხოურ ინტერვენციას. ძალიან მოხარული ვიქნებოდი, თუ საქართველოს თანამდებობის პირები უზრუნველყოფდნენ, რომ არჩევნებში არანაირი უცხოური ჩარევა არ განხორციელდეს“, - აღნიშნა გრეგოროვამ „ინტერპრესნიუსთან“ ინტერვიუში.

იხილეთ ინტერვიუს სრული ვერსია