ქვეშეთი-კობის გზა არ უნდა განვიხილოთ, როგორც რუსეთთან დაკავშირებული პროექტი - ამის შესახებ ვიცე-პრემიერმა მაია ცქიტიშვილმა განაცხადა.
მისივე თქმით, ის ფინანსდება საერთაშორისო ბანკების მიერ და ბრალდებები, თითქოს რუსულ პროექტებს ვანიჭებთ უპირატესობას და შესაბამისად, ვბლოკავთ ისეთ პროექტებს, რომელიც დასავლეთს აინტერესებს, უსაფუძვლოა.
„როდესაც მედია-საშუალებების მეშვეობით ვხედავთ ინფორმაციას, რომ უკვე 4-5 დღეა, სწორედ კობის მონაკვეთზე ზვავსაშიშროების გამო, გადაკეტილია გზა და გაჩერებულია ასობით მანქანა, ქვეშეთი-კობის გვირაბის მოწყობით გვაქვს საშუალება, რომ გავხსნათ კავშირი ყაზბეგთან, კობთან, იმ ადამიანებთან, რომლებიც იქ ცხოვრობენ და რომლებსაც ელემენტარულად არ აქვთ საშუალება, თუნდაც ავადმყოფობის შემთხვევაში, ჩამოვიდნენ თბილისში. ასე რომ, პირველ რიგში, ეს პროექტი არის ორიენტირებული ჩვენი ქვეყნის მოქალაქეების ინტერესებსა და კეთილდღეობაზე,“ - განაცხადა მაია ცქიტიშვილმა.
მინისტრის კომენტარს რეგიონული განვითარებისა და ინფრასტრუქტურის სამინისტრო ავრცელებს.