იაპონიის ჯანდაცვის ოფიციალური პირების ინფორმაციით, ტოკიოს მახლობლად კარანტინში გაჩერებულ გემზე დღეს დამატებით 88 კორონავირუსის შემთხვევა დაფიქსირდა.
აღნიშნული მონაცემით, საკრუიზო ლაინერ Diamond Princess-ზე დაფიქსირებულმა ვირუსის შემთხვევებმა 542-ს მიაღწია, რაც ჩინეთს მიღმა კორონავირუსის კონცენტრაციის ყველაზე მაღალი მაჩვენებელია.
პარალელურად იაპონიას გემის კარანტინში გაჩერების გამო მწვავედ აკრიტიკებენ. კრიტიკოსების თქმით, კარანტინის ეფექტურობის ნაცვლად, ლაინერი ვირუსის ინკუბატორად გადაიქცა.
ამასთან, ზოგიერთმა ქვეყანამ გემიდან საკუთარი მოქალაქეების ევაკუაცია დაიწყო. საკუთარი მოქალაქეები გაიყვანა აშშ-მა. ევაკუაციას გეგმავენ კანადა და დიდი ბრიტანეთიც.