ფინეთის საგარეო საქმეთა მინისტრი, პეკა ჰაავისტო რუსეთის მიერ საქართველოს წინააღმდეგ განხორციელებულ კიბერშეტევას გმობს.
„ფინეთის საგარეო საქმეთა მინისტრი გმობს კიბერშეტევას საქართველოს წინააღმდეგ. ყველა სახელმწიფომ უნდა დაიცვას საერთაშორისო კანონმდებლობა და მოახდინოს გლობალური, ღია, სტაბილური, მშვიდობიანი და უსაფრთხო კიბერსივრცის გარანტია, სადაც ადამიანის უფლებები, ფუნდამენტალური თავისუფლებები და კანონის უზენაესობა დაცული იქნება“,-ნათქვამია „ტვიტერის“ გვერდზე გამოქვეყნებულ განცხადებაში.
შეგახსენებთ, საქართველოს საგარეო საქმეთა სამინისტროს წარმომადგენელმა ვლადიმერ კონსტანტინიდმა უწყებაში გამართულ ბრიფინგზე განაცხადა, რომ 2019 წლის 28 ოქტომბერს საქართველოში განხორციელებული ფართომასშტაბიანი კიბერშეტევა საქართველოს პრეზიდენტის ადმინისტრაციის, სასამართლო სისტემის, სხვადასხვა მუნიციპალიტეტის საკრებულოების, სახელმწიფო, კომერციული და მედია ორგანიზაციების ვებ-გვერდებზე, სერვერებსა და სხვა მართვით სისტემებზე დაიგეგმა და განხორციელდა რუსეთის ფედერაციის შეიარაღებული ძალების გენერალური შტაბის მთავარი სამმართველოს მიერ.
