საფრანგეთის პრეზიდენტი, ემანუელ მაკრონი გერმანიას, რუსეთსა და თურქეთს მოუწოდებს, დაუყოვნებლივ ჩატარდეს სირიის საკითხთან დაკავშირებით სამიტი, რათა მოხდეს ჰუმანიტარული კატასტროფის თავიდან აცილება რეგიონში.

„ჩვენ რაც შეიძლება სწრაფად უნდა გავმართოთ ე.წ. სტამბულის ფორმატში მოლაპარაკებები“, - განაცხადა მაკრონმა ბრიუსელში ევროკავშირის ლიდერების შეხვედრის დასრულების შემდეგ. მისივე თქმით, მოწოდებების მიუხედევად, რუსეთის მიერ მხარდაჭერილი ძალები ჩრდილო-დასავლეთ სირიაში წინ მიიწევენ.

„მათი ეს ქმედებები ჰუმანიტარული კატასტროფის, კონფლიქტის ესკალაციის და სამიგრაციო კრიზისის საფრთხეებს ქმნის“,-განაცხადა მაკრონმა.

სირიის ჩრდილო-დასავლეთში არსბულ ვითარებას გამოეხმაურა გაეროს გენერალური მდივანიც. „საგანაგაშოა მშვიდობიანი მოსახლეობის დაღუპვის მაჩვენებლები ჩრდილოდასავლეთ სირიაში. ასობით ადამიანი მოკლეს. პატარა ბავშვები ყინვისგან კვდებიან. ადამიანების მიერ შექმნილი ჰუმანიტარული კოშმარი და ადამიანების არნახული ტანჯვა უნდა დასრულდეს“,-წერს გუტიერესი „ტვიტერის“ საკუთარ გვერდზე.