პოლიტიკური გაერთიანება „ლელო საქართველოსთვის“ ერთ-ერთი ლიდერი გიგლა მიქაუტაძე ფინანსთა მინისტრს სამი კითხით მიმართავს.

„პარლამენტში ფინანსთა მინისტრის, ივანე მაჭავარიანის საკომიტეტო მოსმენა იმართება, სადაც ის, სხვა საკითხებთან ერთად, საქართველოში ლატარიების, აზარტული და მომგებიანი თამაშობების მოწყობის შესახებ კანონზეც ისაუბრებს. ამ კანონის საშუალებით, 2017 წელს ფინანსთა სამინისტრომ მოკლა კონკურენცია ლატარიის ბაზარზე და დააკანონა მონოპოლია. მსურს 3 კითხვით მივმართო ფინანსთა მინისტრს:

1. რა ბედი ეწია 200 მილიონ ლარს, რომელიც, 2009-2016 წლებში არ გადაუხად აბიუჯეტს შპს „საქართველოს ლატარიის კომპანიამ“ და ვინ აგო ამაზე პასუხი?
2. რამდენმა კომპანიამ მიიღო 2017 წელს ლატარიის ორგანიზებასა და ჩატარებაზე უფლებამოსილი პირის გამოსავლენად ჩატარებულ ტენდერში მონაწილეობა, რომლის შედეგადაც კერძო კომპანია შპს "ჯორჯიან ნეიშენელ ლოთთერი" ექსკლუზიური უფლების მფლობელი გახდა 10 წლის განმავლობაში და როგორ ასრულებს ეს კომპანია აღებულ ვალდებულებებს?
3. იცნობთ თუ არა სხვა რომელიმე ქვეყნის წარმატებულ პრაქტიკას, სადაც ლატარიის ჩატარების უფლება მხოლოდ ერთ კერძო კომპანიას აქვს?

იმედია, მინისტრის პასუხი ამჯერად იქნება დროული და ადეკვატური და ის არ მოგვიწოდებს შევეგუოთ მონოპოლიას’“, - განაცხადა გიგლა მიქაუტაძემ.

აღნიშნულ კომენტარს პოლიტიკური გაერთიანება „ლელო საქართველოსთვის“ ავრცელებს.