„ევროპული საქართველოს“ ერთ-ერთი ლიდერის, გიგა ბოკერიას ინფორმაციით, ოპოზიცია მაჟორიტარი დეპუტატობის საერთო კანდიდატებზე ჯერჯერობით, არ შეთანხმებულა.

როგორც ბოკერიამ „პალიტრანიუსის“ გადაცემაში „360 გრადუსი“ განაცხადა, იმ ლიდერების გვარები, რომელთა შესახებაც დღეს მედიაში გაჟღერდა, განიხილებიან სხვადასხვა ოლქებში კანდიდატებად, თუმცა საბოლოო გადაწყვეტილება მიღებული არ არის.

„იმ გვარების მნიშვნელოვანი ნაწილი ისეთი ლიდერები არიან, რომ ბუნებრივია განიხილებიან, ამას მე დავამატებდი ელისაშვილს, გუგავას… აი, ეს ყველა გვარები განხილვის საგანი იყო და სხვებიც კიდევ. ჯერ საბოლოო სია არ არსებობს... დავამატებდი ზურაბ ჯაფარიძის გვარსაც, ვისურვებდი, რომ მარგველაშვილი, თუ ის მიიღებს გადაწყვეტილებას, იყოს ამ კონკურენციაში, ის ძალიან ძლიერი კანდიდატი იქნება „ოცნების“ წინააღმდეგი ნებისმიერ ადგილას, მაგრამ ეს ჩემი სურვილია. ზუსტად ასევეა ეს გვარებიც. ეს ყველა გვარი სწრაფად გავიარეთ, მოვნიშნეთ ლიდერები”, - განმარტა ბოკერიამ.

ცნობისთვის, დღეს მედიაში გავრცელდა ინფორმაცია, რომ ოპოზიცია თბილისში მაჟორიტარი დეპუტატების საერთო კანდიდატების ნაწილზე შეთანხმდა.