სამხრეთ კორეაში კორონავირუსით მეცამეტე პაციენტი დაიღუპა, - ამის შესახებ ინფორმაციას ქვეყნის დაავადების კონტროლისა და პრევენციის ცენტრი ავრცელებს.

მათივე ინფორმაციით, სამხრეთ კორეაში ვირუსის 334 ახალი შემთხვევა გამოვლინდა და დაინფიცირებულთა საერთო რაოდენობა 1 595-მდე გაიზარდა.

აღსანიშნავია, რომ ახალი შემთხვევებიდან უმეტესობა ქალაქ დეგუში დაფიქსირდა, სადაც მდებარეობს ეკლესია, რომელიც ქვეყანაში ვირუსის გავრცელებასთანაა დაკავშირებული.

სამხრეთ კორეის სამხედრო უწყების ინფორმაციით, კორონავირუსით სულ ცოტა 21 ჯარისკაცია დაინფიცირებული და სამხედრო მოსამსახურეებს ბაზების დატოვება აქვთ აკრძალული. ვირუსის გავრცელების თავიდან ასაცილებლად აშშ-სა და სამხრეთ კორეის ერთობლივი სამხედრო წვრთნები გადაიდო.

რაც შეეხება გლობალურ სტატისტიკას, მსოფლიოში ვირუსით 2 700 ადამიანია დაღუპული, დაინფიცირებულთა რაოდენობა კი - 80 000-ს აჭარბებს.