ავიაკომპანია Turkish Airlines-მა კორონავირუსის გამო, იტალიაში ყველა რეისის დროებით გაუქმების გადაწყვეტილება მიიღო. როგორც ავიაკომპანიის განცხადებაშია აღნიშნული, ის იტალიაში რეისებს პირველი მარტიდან წყვეტს.

მანამდე, ავიაკომპანიამ ვირუსის პრევენციის მიზნით, 250 თვითმფრინავში სადეზინფექციო სამუშაოები ჩაატარა.

შაბათს თურქეთის ჯანდაცვის მინისტრმა ფაჰრეტინ კოჯამ განაცხადა, რომ კორონავირუსის გამო თურქეთმა იტალიასთან, ერაყთან და სამხრეთ კორეასთან საჰაერო მიმოსვლა შეწყვიტა. ზომა დღეიდან ამოქმედდა. გარდა ამისა, თურქეთმა ერაყთან სახმელეთო მიმოსვლაც შეწყვიტა.

კორონავირუსის გავრცელების მხრივ, ევროპის ქვეყნებს შორის იტალიაში ყველაზე რთული მდგომარეობაა. ქვეყანაში დაღუპულთა რიცხვმა 30-ს მიაღწია, ხოლო ინფიცირებულია 820 ადამიანი.

მანამდე Turkish Airlines-მა ფრენები შეაჩერა ჩინეთსა და ირანში.

იხილეთ ვიდეო: Turkish Airlines-მა კორონავირუსის გამო იტალიაში დროებით ფრენები შეწყვიტა