გერმანიის ქალაქ ჰამბურგში ათასობით ადამიანმა აქცია გამართა. შეკრებილები ითხოვენ, რომ მთავრობამ ქვეყანაში ლტოლვილები მიიღოს.

აქციის ორგანიზატორი ორგანიზაცია „Seebrücke“ -ია (ზღვის ხიდი). მათი თქმით, ევროპის ქმედებები სამარცხვინოა. „ჰამბურგს აქვს საკმარისი სივრცე“,- სკანდირებდნენ მომიტინგეები.

„ყველა ქუჩაში უნდა გამოვიდეს, რომ სოლიდარობა გამოხატონ იმ ადამიანების მიმართ, ვისაც თავშესაფრის პოვნის უფლება აქვთ“,-აცხადებენ ორგანიზაციაში.

ამასთან, ქვეყანაში აცხადებენ, რომ გერმანიის მთავრობა მუშაობს სხვა ქვეყნებთან, რომ მოხდეს მიგრანტი ბავშვების ევროპაში შეშვება.

„გერმანიამ გამოხატა სურვილი საბერძნეთის ბანაკებიდან მიიღოს დაახლოებით 1500 მიგრანტი, რომელთაც ბავშვები ახლავთ“,- განაცხადა ოფიციალურმა წყარომ.

შეგახსენებთ, თურქეთის პრეზიდენტის, რეჯეფ ტაიფ ერდოღანის გადაწყვეტილებით, ქვეყანა იმ მიგრანტებს, რომელთაც ევროკავშირში სურთ შესვლა „კარებს აღარ დაუკეტავს“. გავრცელებული ინფორმაციით, ათიათასობით ადამიანი საბერძნეთის საზღვრებთან იმყოფება, საიდანაც ევროპაში მოხვედრას ცდილობენ. მედიის ცნობით, ბერძენ სამართალდამცველებსა და მიგრანტებს შორის არაერთხელ მოხდა შეტაკებები, რა დროსაც ბერძნულმა მხარემ წყლის ჭავლი და ცრემლსადენი გაზი გამოიყენა.