საქართველოს 50 წლის მოქალაქესთან მიმართებაში, რომელსაც ახალი კორონავირუსის ინფექცია ქვეყანაში პირველს დაუდასტურდა, ტესტმა 14 დღის შემდეგაც დადებითი პასუხი აჩვენა.

შესაბამისად, როგორც „ინტერპრესნიუსს“ ინფექციურ საავადმყოფოში განუცხადეს, აღნიშნული პირი კვლავ კლინიკაში რჩება, რადგან ითვლება, როგორც ინფექციის გამავრცელებელი.

მათივე განმარტებით, 50 წლის მამაკაცს ახალი ტესტი გუშინ, ინფექციის დადასტურებიდან 2 კვირიანი ინკუბაციის პერიოდის გასვლის შემდეგ ჩაუტარდა.

„ვირუსის სიმპტომები არ აქვს, თუმცა ტესტმა დადებითი პასუხი აჩვენა, რაც ნიშნავს, რომ ინფექცია სხეულში ჯერ კიდევ რჩება. შესაბამისად, პაციენტი ვერ ტოვებს კლინიკის ბოქსირებულ პალატას, რადგან ვირუსის გამავრცელებლად ითვლება“, - განუცხადეს სააგენტოს ინფექციურ საავადმყოფოში.

მათივე განმარტებით, მამაკაცს ტესტი კიდევ ჩაუტარდება, რომლის პასუხთან დაკავშირებითაც განცხადება მოგვიანებით გაკეთდება.

შეგახსენებთ, რომ 50 წლის მამაკაცი, რომელიც საქართველოში ირანიდან შემოვიდა, პირველია, ვისაც ქვეყანაში ახალი კორონავირუსი დაუდასტურდა. აღნიშნული პირი საქართველოში 25 თებერვალს შემოვიდა, 26 თებერვალს კი ვირუსი ლაბორატორიულად დაუდასტურდა.

იხილეთ ვიდეო: კორონავირუსით დაინფიცირებულ პირველ პაციენტს ვირუსი კვლავ უდასტურდება