ირანმა კიდევ ერთხელ გააკეთა კომენტარი აშშ-ის პრეზიდენტის, დონალდ ტრამპის შეთავაზებაზე, რომ ვაშინგტონი მზად არის კორონავირუსთან ბრძოლის დროს დახმარება გაუწიოს ქვეყანას. საგარეო საქმეთა სამინისტროს პრესსპიკერმა, აბას მოუსავიმ ამერიკის ლიდერის განცხადებებს „თვალთმაქცობა“ უწოდა.

„თანაგრძნობის ამ საძაგელი გამოვლინების ნაცვლად, თქვენ უნდა დაასრულოთ ეკონომიკური და სამედიცინო ტერორიზმი, რათა სამედიცინო პერსონალმა შეძლოს მარაგებზე წვდომა, რომ დაეხმაროს ირანელ ხალხს. ჩვენ ამერიკელი ექიმები არ გვჭირდება. ჩვენ მსოფლიოში ყველაზე კომპეტენტური და მამაცი სამედიცინო პერსონალი გვყავს“,-განაცხადა მოუსავიმ.

ცნობისთვის, ოფიციალური მონაცემებით, ირანში ამ დროისთვის კორონავირუსის 11 364 შემთხვევაა დაფიქსირებული, ხოლო დაღუპულთა რაოდენობამ 514 შეადგინა.